انتوا السبب في اللي أنا فيه ".................."احنا ربيناك أحسن تربية وماحرمناكش من حاجه" يا ترى مين فيهم الصح؟ أهلاً بيكم في أول مقالة من السلسلة الجديدة، الفترة اللي جايه حنتكلم عن دور الآباء في معاناة/سعادة الأبناء.... موعدكمش إنه يكون كلام سهل وخفيف، بس اللي أقدر أوعدكم بيه إني مش جايه أربي حد ولكن هدفي دايماً هو نشر الوعي ويا رب أبلغ الرساله من غير ما أقلب عليكم مواجع تقيلة... تعالوا نكتشف سوا… الطفل لما يتم سنتين بيبدأ يعتمد على نفسه، وبيحب يستخدم كلمة "لأ"; عشان يحس إن له سيطرة على حياته، لحد ما يوصل لسن التمرُّد أو "البلوغ";، وهنا فيه نوعين من الآباء والأمهات بيتعاملوا مع ال لاء: الإيجابي: بيتفهّم ويفتكر إنه مر بنفس الفترة وإنها عاصفة وهتعدي بالصبر والاستيعاب.. السلبي: بيعند على عند ولاده ويتحجج بإنه بيعلمهم الصح من الغلط، وبيكون داخل معركة مش بيربّي. يالا نعرف النتايج لكل أسلوب تربيه و نبدأ بالسلبي: ١- انعدام الثقة في النفس وتدني ذات: الأهالي اللي بيوصولوا لولادهم مفاهيم زي إن عشان هم أهله وجابوه للدنيا فلهم الحق إنهم يشتموه ويعنفوه ويجبروه على دراسة أو شغل أو جوازة في المستقبل، بيربوا شخص اعتمادي، لأ وكمان للأسف بيبرر تصرفات أهله، وبيشوف إنه يستاهل يتعنّف. ٢- الإنكار: الطرفين بيكون عندهم شعور بالإنكار لكل اللي مروا به، الأهل بينكروا إنهم أخطأوا أوقات وبيشوفوا إنهم كتّر خيرهم ومايستاهلوش القسوة دي، أما الأبناء بيواجهوا صعوبة بالغة في إنهم يسترجعوا الذكريات المؤلمة دي ويربطوها بتصرفاتهم دلوقتي، ويغيروا الصورة المثالية اللي راسمينا لأهلهم. ٣- الإحساس بالذنب: غالباً الأهل بيبرروا تصرفاتهم بإن الطفل كان شقي جداَ وهو صغير أو أو… والمشكلة إن الطفل اللي بقى شاب كبير دلوقتي أو شابة بيكبروا بالإحساس بالذنب، مثلاً: بيشوفوا إن ماما كانت عنيفة عشان بابا بيعنفها، وبابا عنيف عشان شغله صعب ومصاريفنا كتير. حلقة من الذنب محدش عارف أولها من اخرها. اما بقي الأسلوب الإيجابي .... بنربي فيه و بنتخانق ساعات برضه عادي جداً و بنصمم علي حاجات بس مش بنهين و لا نكسر عضم. بنشرح الأسباب و ندي مساحه آمنه للخطأ عشان نتعلم. مفيش تربيه ورديه لازم حيكون فيه شد و جذب بس مش بطحه مهما يفوت عليها سنين و تيجي ايدي عليها احس بوجع من ذكراها لا و كمان افضل أقول ل نفسي انا استاهل البطحه دي اصلي كنت طفل/طفله صعب. مفيش حد يستاهل الألم و المعاناه .. مفيش حد يتساهل يحس بالضعف و قلة الحيله لان حجر الأساس في حياته مكنش مؤمن بيه و داعم ليه كفايه. #toxicparenting #دكتورةسعادةمشدكتورة_نفسية #regret #Happiness #loveyourself #inspiration #life #lifestyle #دكتورة_سعادة_مش_دكتورة_نفسية See less